زيارتي إلى مجمع الأمل للصحة النفسية بالرياض‎

زيارتي الى مجمع الامل للصحة النفسية بالرياض

بقلم أبو سمر

خوف ,قلق , تصورات قديمة عن المرضى النفسيين.
انتابتي هذه المشاعر عندما فكرت ازور مجمع الامل للصحة النفسية او بالاسم المعروف مستشفى الامل للصحة النفسية بالرياض
والذي يعالج المرضى من النفسية ويعالج المدمنين على المخدرات ,كنت اتذكر المستشفى عندما كان في مبنى بحي السلي بالرياض
وكان غالبية المراجعين (يدقون اللطمة) قبل الدخول اليه

**********
(دقيت اللطمة ) وتوجهت نحوه في مبناه الجديد في حي الخزامى بالرياض
0(هذا الحي يعتبر من افضل الاحياء بالرياض وايجار شقة صغيرة قد يتجاوز 35 الف ريال)
توقفت عند البوابة الساعة 11 صباحا الجو حار بالطبع ولكني رأيت مراجعين كثيرين يدخلون ويخرجون (ومافيه لطمة)
وهذا شجعني على ان ازيلها بعد ان زادتني توترا ,,,, كان المبنى قمة في الفخامة
قابلت موظف الامن بالبوابة وسلمت عليه وقلت له ( جاي ابشوف المستشفى بس)
فقال :حياك الله روح ادارة العلاقات العامة والاعلام المبنى اللي على يمينك

[ندعوك للتسجيل في المنتدى أو التعريف بنفسك لمعاينة هذه الصورة]

كنت وأنا أمشي اسولف مع نفسي اقول لايشوفني احد اقاربي يقول هذا مدمن ولا وش جايبه
وكنت افكر ايش بقول للعلاقات العامة اقول انا فاضي عندي اجازة وجاي اتمشى ولا ايش؟
******
وصلت لادارة العلاقات العامة والاعلام وطلبت اقابل مدير العلاقات العامة والاعلام فلقيته شاب بشوش
كان قمة في التعامل واسمه حمد بن مشخص
ويوم قلتله أنا جاي اتمشى في المستشفى ضحك وقال (خذ لك لفه على سور المستشفى ترا البلدية معتمدينه ممشى)
وبعد ماعرف أني ناوي اساهم بالكتابة في الانترنت , قال جزاك الله خير وبهذا العمل تقدم لنا وللمستفيدين خدمة
واخذني في جولة بالمجمع بس ماسمح لي بالتصوير لان فيه مرضى ومراجعين
: لقيت المستشفى من جوا اشبه بالمنتجع خضره ونوافير وممرات مزركشه
واخذت منهم بعض الصور المتوفرة

[ندعوك للتسجيل في المنتدى أو التعريف بنفسك لمعاينة هذه الصورة]

شوف الخضرة اللي ترد الروح منتجع فايف ستارز
*******************
ازعجت حمد باسئلتي بس كان طيب ومتفهم
وذكر لي عدد المراجعين خلال عام 1429 هـ
للطوارئ بالمستشفى وكان عددهم اكثرمن 26 ألف حالة وفي العيادات الخارجية 29 ألف حالة
بس بعضها تراجع اكثر من مرة
وكمان قال عندنا ضغط كبير على اسرة التنويم لان بعض الحالات تحتاج وقت طويل في التنويم
قابلت خلال الجولة بعض المرضى ولقيتهم مرضى عاديين
ومايخوفون مثل ماتصور لنا بعض المسلسلات الدرامية البكائية

[ندعوك للتسجيل في المنتدى أو التعريف بنفسك لمعاينة هذه الصورة]

قبل مدة سوى المجمع جولة على المراكز الصحية واهداني مدير العلاقات صور من هالجولة
والمعلومة الجديدة انهم لقوا كثير من المرضى المراجعين للمستوصفات عندهم اضطرابات نفسية وماهم دارين
وخاصة اللي عندهم بعض الامراض المزمنة او عندهم مشاكل عائلية

[ندعوك للتسجيل في المنتدى أو التعريف بنفسك لمعاينة هذه الصورة]

عند المستشفى او المجمع عدة طرق لمعالجة المدمنين
ويسوون حفل سنوي لتخريج اللي استمروا في الاقلاع عن هذا المرض عافانا الله واياكم منه
وتحت تلقى صورة لاحد الشباب اللي يكرمونه عشانه صمم على ترك المخدرات بعد ما خسرته كل شيء
وشوف من يكرمه مدير المستشفى براسه الدكتور محمد القحطاني
والمريض اللي يكرمونه هذا له قصة طويله بس اختصارها انه طاح فالمخدرات بسبب صديقه وهم مراهقين
وبعد ماكان متفوق في المدرسة اصبح اسوا طالب وترك الدراسة وسرق ذهب امه
ومعاشه وتركها فقيرة ووصل معه الامر لضربها اذا مااعطته
بس انتبه لعمره وراجع المستشفى ولازال يتعالج ويراجع من حوالي 9 اشهر
وهم يكرمونه عشان يشجعونه ماينتكس لمصايبه اللي قبل

[ندعوك للتسجيل في المنتدى أو التعريف بنفسك لمعاينة هذه الصورة]

كمان عندهم اساليب في المعالجة ماهي دوا وبس فيه رياضه وترفيه وينصحونه باصدقاء جدد
ويخلونه يراجع عند اخصائي اجتماعي ونفسي
وفيه مسبح حلوو جدا للمرضى وصالة فيها العاب بلايستيشن واجهزة رياضية

[ندعوك للتسجيل في المنتدى أو التعريف بنفسك لمعاينة هذه الصورة]

وفيه موظفين في المستشفى اسمهم مرشدين تعافي وهم اللي كانوا قبل مدمنين بس تعالجوا وتدربوا واخذوا دورات
وهم يعطون المرضى محاضرات ويتواصلون معهم ويجلسون معهم بالساعات
ويقصون عليهم المصايب اللي جاتهم من المخدرات ويعلمونهم كيف قدروا يتخلصون منه
والفكرة ناجحة جدا حتى انهم اكثر من يقنع المدمنين بضرورة العلاج السريع
**********
وهذي صورة من صالة للعلاج الطبيعي للمرضى

[ندعوك للتسجيل في المنتدى أو التعريف بنفسك لمعاينة هذه الصورة]

وعشان اكثر اللي يقعون في الادمان يكونون من طلبة المتوسط و الثانوي
سوا المستشفى دورات للمرشدين الطلابيين ودربوا حوالي 600 مرشد طلابي على كيفية التوعية عن المخدرات

[ندعوك للتسجيل في المنتدى أو التعريف بنفسك لمعاينة هذه الصورة]

كان مجمع الامل تجربة ناجحة جد في علاج الامراض الادمانية والنفسية
وفيه دول ارسلت وفود لها لدراسة هالتجربة مثل الكويت والامارات وقطر
وفي هالصورة وفد قطري كبير المستوى مع مدير العلاقات العامة بالمجمع
كانوا يبغوا يعرفوا اساسيات هالتجربة عشان ناوين يفتتحوا مركز علاج ادمان بقطر

[ندعوك للتسجيل في المنتدى أو التعريف بنفسك لمعاينة هذه الصورة]

نسيت اقول ان المستشفى من برامجه المسرحيات الترفيهية والتثقيفية
للمرضى النفسيين والمدمنين عن كيفية مواجهة مشاكل الحياة
وفي بعض المسرحيات يسويها المرضى عن قصصهم

شوف التفاعل من المرضى - صراحة بيئة جديدة تعيد لهم الحياة

[ندعوك للتسجيل في المنتدى أو التعريف بنفسك لمعاينة هذه الصورة]

فيه مركز لتدريب المرضى وتعليمهم حرف وفيه مدربين
وكمان ورشة رسم بالالوان وشفت بعض من لوحات المرضى كانت قمة في التعبير

[ندعوك للتسجيل في المنتدى أو التعريف بنفسك لمعاينة هذه الصورة]

لاحظ المجسم اللي سواه احد المرضى المدمنين (يسار)وفيه قصته
كيف المخدرات تجره نحو الهاوية واسرته متعلقه فيه (قمة التصوير ) تغني عن الف عبارة

[ندعوك للتسجيل في المنتدى أو التعريف بنفسك لمعاينة هذه الصورة]

وصلنا الى الموضوع اللي استغربته
فيه اطفال مرضى نفسيين
وفيه قسم مخصص لهم
يااااااالله

(طفل مريض نفسي )شئ يبعث على القلق صراحة ويدل على ان المجتمع بحاجة الى دراسة سلوكية
كيف عقدنا عيالنا وسببنا لهم امراض نفسية ؟
لكن يوم سمعت عن برامج علاجهم ارتحت وارتحت اكثر يوم شفت رسومات الاطفال البرئية
وهي اهداء لكم:

[ندعوك للتسجيل في المنتدى أو التعريف بنفسك لمعاينة هذه الصورة]

وايضا فيه خدمة استشارات هاتفيه من المجمع على
014804548 تحويلة 8888 يوميا من 8 الى 3 عصر
وارجوكم الدعاء لي بالتوفيق
وإلى زيارات قادمة والسلام عليكم

[ندعوك للتسجيل في المنتدى أو التعريف بنفسك لمعاينة هذا الرابط]

ميرسي كتيرع الطرح

الاكثر من رائع

ربي يعطيك الف عافيه

لا تحرمنا من جديد ابداعك

ودي واشوقي .. حلومه

[ندعوك للتسجيل في المنتدى أو التعريف بنفسك لمعاينة هذا الرابط]

نورتي اختي الله يعيطك الف الف الف عافيه على الر دالجميل

تقبلي تحياتي

بارك الله فيك

موضوع حلوووووووووووو

الله يعطيك العافيه

نورتي
الله يعيطك الف عافيه
على الرد

» ماهـــي السعادة النفسية ؟؟
» أعمال تخريبية في طعس الهرم بالرياض
» زيارتي لمعرض السيارات 2010