أغاني يداتنا على اليهالووه

¶**¶ أغاني يداتنا علي اليهالووه ¶**¶
________________________________________
صبحكم الله بالخير ..

شحوالكم .. شحوال جهالكم ؟؟

اليوم يايبة لكم حاجة مغبرة وعليها سافي ..

من هو امه لو يدته ماغنت عليه يوم هو ياهل ..تدكروا أغاني لول لو ماتدكرو عاد ماتحلى النومة الا بها ..
عن الكلمات الصعبة ..
والا عنده اغاني فانية يحطها شان الكل يستفيد اليوم جبت ليكم شم غناية .. بس لاحد يسأل ويغني على اوليداته
عاد بعدين الله يعين الجيران ..

اول شي : التصبيح بالياهل :

 صباحك الصباحي والورد والتفاحي
صباحك صباحين صباح الكحل في العين ...صباح يطرد الفقر .. صباح يطرد الدين .. صباح الناس مرة صباحك عشر وفنتين
صباح الخير قبل مايرفرف الطير والطير له جناحين والى وليدي نبا الخير
صباحك السعادة زيارة علي و أولاده وكل يومٍ مضى من عمر وليدي زيادة
صباحك لولو البحر مسباحك .. والبين مايندلك ولا يسمع صياحك
يعمري من نام وقعد... والنوم في عيونه بعد

أغاني باسماء الوليدات
بابا "الأسم " تعال جيب ليها خلال .. من خلال الداليا .. "الأسم " يالغالية

زهرا:
زهرا زري امقنعة بالمشمري أبوها غايب السفر يبيع ويشتري

حسين :
هذا حسين نور العين .. يفرح لا شاف القرشين

احمد او احمدوه :
أحمدوه دقاق الشلبة ... أحمدوه ماحد يغلبه ...أحمدوه أحرس ربه ... أحمدو وايد أحبه

حسن :
حسن حسن حسنسن راح البحر يتسنسن ..في مشيته يتفنن كلامه أحسن وأحسن
علي :
علوي شب "جب" اللبن راح لأمه مستجن .. علوي شب "جب" الحليبة علوي ماحد يجيبه ...
زينب :
زينب تجمع الحوي .. ضاعوا تراكيها .. تمبى تراكي ذهب .. وابوها يراشيها

أغاني الترقيص :

¤ ياغناتي هالولد يكبر ويعمر البلد ويعيش لأمه هالولد
¤ متى اشوفك ملتحي واشوف قدك واستحي واقول تغطوا جاكم "الأسم " ريال
¤ ارقصي ياراقصة فوبش ماناقصة ..طوله طول القدم .. زايد ماناقصة
¤ ارقصي يا رقاصة ابوش مقدم الغاصة يجيب لأمش لولو وإلى العدوة ارصاصة
¤ هلو هلو هلوها ... من الذهب ملوها .. سبعين حبشية تخدم في بيت ابوها
¤ تشيل ريول وتحط ريول حسافة ماعليها حيول
¤ صبري عليي بس شهر يا غناتي... وأعطيش ريالٍ غني ياغناتي ... سيد ولا عنده امبني ياغناتي

إذا وقف الياهل :

وقف وقف " الأسم " طال السقف " الأسم "
وقف وقف حيدة .. طال السقف بيده

متفرقات

§ ياسنور تت ماعندنا بت ماعندنا إلا " الأسم " اتصيح وتسكت

§ حبيبتي وريدش .. والعبدة تغسل أيدش .. حبيبتي واني امش ... اشق شبدي واضمش

§ إلا مايقول لش يعيني يعمى بالفنتيني .. يطلق أم أولاده ويكفر عليه الدينِ ..
إلا مايقول لش مرحبى ..لا عاد في بيته ربى .. ولا فرح بيوم عيد ومالبس فوب يديد

§ زانة زانة زانة والباقي تعرفوه ..

§ سطاحة بطاحة وكلاب البدو نباحة .. هذا للبابا .. هذا للماما .. هذا لديدة ..هذا للخالة .. هذا لرنيم وقال الفار دلوني بيت رنيموه ودوني ..

ولتنييم الياهل ..
نام هلولو عن الشـ "جـ"ـليب والعوعو .. نام هوّى عن الشليب والعوى ..

صلوات على النبي .. ياعين عنها جنبي ..صلوات اعلى محمد والعدو اعمى مصمد ..

صلوات اعلى النبي والسلام على علي نور الهدى يامحمد شمس الضحى ياعلي ..شمس الضحى اظلمت وردها المولى علي

وبس .. سالمين وسلموا سلمواعلى يداتكم ..
والا عنده اي غناية على اليهال يجيبها هنيه يحطها .. هذاني استناكم والا ماييب ان شاء الله تطلع له ام الخضر و الليف

نورتي

نورت

مشكورين على آلمرور

نورتـ ’’

تسسسسسسسسلمي على المرور

يسلمووووووووووو
ياللا
على الموضوع الحلوة

الله لايحرمنا من هلطلة
دمتي موفقة لكل خير

روعه تسلمين حبوبه
تحياتي

يسلمووووو على الطرح الرآآآآآآآآآآآآآئع

منورين يآلغوآلي

لآتحرمونآ من آلردود آلحلوهـ [ندعوك للتسجيل في المنتدى أو التعريف بنفسك لمعاينة هذه الصورة]

تحيآتي